സംവിധായകൻ ഷാഫി അന്തരിച്ചു

കൊച്ചി: സംവിധായകൻ ഷാഫി അന്തരിച്ചു. കൊച്ചിയിലെ സ്വകാര്യ ആശുപത്രിയിൽ കരൾ രോഗത്തെ തുടർന്ന് ചികിത്സയിലിരിക്കെയാണ് അന്ത്യം. 56 വയസ്സായിരുന്നു. ഈ മാസം പതിനാറിന് ആശുപത്രിയിൽ പ്രവേശിപ്പിച്ച ഷാഫിയുടെ ആരോഗ്യനില മോശമായതിനെ തുടർന്ന് വെന്റിലേറ്ററിൽ പ്രവേശിപ്പിച്ചിരിക്കുകയായിരുന്നു.

ഹാസ്യത്തിന് നവീനഭാവം നൽകിയ സംവിധായകനായിരുന്നു ഷാഫി. ജയറാം നായകനായ വൺമാൻ ഷോ ആയിരുന്നു ആദ്യചിത്രം. റാഫി മെക്കാർട്ടിൻ ടീമിലെ റാഫി മൂത്ത സഹോദരനാണ്. സംവിധായകൻ സിദ്ധിഖ് അമ്മാവനാണ്. 1990ൽ രാജസേനന്റെ സഹസംവിധായകനായാണ് സിനിമരംഗത്തേക്കുള്ള പ്രവേശം. ആദ്യത്തെ കൺമണിയാണ് ഷാഫി അസിസ്റ്റന്റ് ഡയറക്ടറായ ആദ്യചിത്രം.

ഒരു തമിഴ് സിനിമയുൾപ്പടെ നിരവധി സിനിമകൾ സംവിധാനം ചെയ്തിട്ടുണ്ട്. കല്യാണരാമൻ, പുലിവാൽ കല്യാണം, തൊമ്മനും മക്കളും, മായാവി, ചട്ടമ്പിനാട്, ടൂ കൺട്രീസ്, ചോക്ലേറ്റ്, ചിൽഡ്രൻസ് പാർക്ക്, മേരിക്കുണ്ടൊരു കുഞ്ഞാട്, മേക്കപ്പ്മാൻ, വെനീസിലെ വ്യാപാരി, ഷെർലക് ടോംസ്, 101 വെഡ്ഡിങ്സ്, ഒരു പഴയ ബോംബ് കഥ, ആനന്ദം പരമാനന്ദം എന്നിവയാണ് ഷാഫി ഒരുക്കിയ ചിത്രങ്ങൾ.